গ'গ স্পৰ্টছ এন ইৰ প্ৰতিবেদন

অসম সন্তান পাৰ্থিৱ গগৈৰ দুগলৰ সহায়ত প্ৰত্যাশিতভাবে নৰ্থ ইষ্ট ইউনাইটেড এফ চিয়ে চলিত "১৩৫ সংখ্যক ইণ্ডিয়ান অইল ডুৰাণ্ড কাপ ফুটবল প্ৰতিযোগিতা"ৰ কোৱাৰ্টাৰ ফাইনেলত প্ৰৱেশ কৰিছে৷ আই এছ এলৰ দলটোৰে মংগলবাৰৰ অন্তিমখন গ্ৰুপ মেচতো সহজ জয় অৰ্জন কৰি অপৰাজেয় হৈ গ্ৰুপত শীৰ্ষস্থানত থাকি কোৱাৰ্টাৰ ফাইনেললৈ উন্নীত হয়৷

গুৱাহাটীৰ অজুৰ্ন ভোগেশ্বৰ বৰুৱা ক্ৰীড়া প্ৰকল্পৰ ইন্দিৰা গান্ধী এথলেটিকছ ষ্টেডিয়ামত অনুষ্ঠিত গ্ৰুপ ‘এফ’ৰ পঞ্চম মেচখনত নৰ্থ ইষ্ট ইউনাইটেডে প্ৰতিদ্বন্দ্বী জন্মু-কাশ্মীৰৰ দল এফ চি ওৱানক ৩-১ গলৰ ব্যৱধানত পৰাস্ত কৰে৷ নৰ্থ ইষ্ট ইউনাইটেডৰ হৈ অসম সন্তান পাৰ্থিৱ গগৈয়ে দুটা গল দিয়াৰ বিপৰীতে এটা গল কৰে তাৰকা আলাদিন আজাৰয়ে৷

উল্লেখ্য যে বিগত দুটা ছিজনৰ চেম্পিয়ন নৰ্থ ইষ্ট ইউনাইটেড এফ চিয়ে ইতিমধ্যে প্ৰথম দুখন মেচত জয়লাভ কৰি আত্মবিশ্বাসী হৈ আছিল৷ মংগলবাৰে দলৰ মুখ্য প্ৰশিক্ষক জুৱান পেড্ৰ’ বেনালীয়ে আৰম্ভণিৰ পৰাই পাৰ্থিৱক খেলাৰ সুযোগ দিয়ে৷ খেলৰ ১১ মিনিটতে পাৰ্থিবে প্ৰথমটো গল কৰি বিৰতিলৈ দলক আগুৱাই ৰাখে৷

দ্বিতীয়াৰ্ধৰ আৰম্ভণিত পুনৰ পাৰ্থিবে ৫৪ মিনিটত গল কৰি ব্যৱধান ২-০ কৰে৷ আনহাতে, মৰক্কোৰ তাৰকা ষ্টাইকাৰ আজাৰাই ৬৮ মিনিটত নৰ্থ ইষ্ট ইউনাইটেডৰ হৈ তৃতীয়টো গল কৰে৷ বিপৰীতে এফ চি ওৱানৰ মহম্মদ ইলিয়াছে ৭১ মিনিটত এটা গল কৰি ব্যৱধান হ্ৰাস কৰে৷ ইয়াৰপূৰ্বে প্ৰথম মেচত বড়োলেণ্ড এফ চিক ৬-০ গলত পৰাস্ত কৰা নৰ্থ ইষ্ট দলে দ্বিতীয় মেচখন মেচত কাৰ্বি আংলং মৰ্ণিং ষ্টাৰ এফ চিক ৪-১ গলত পৰাস্ত কৰিছিল৷

উল্লেখ্য যে ভাৰতীয় ফুটবল ইতিহাসৰ গৌৰৱময় সাক্ষী লগতে এছিয়াৰ আটাইতকৈ প্ৰাচীন তথা বিশ্বৰ পঞ্চম পুৰণি ফুটবল প্ৰতিযোগিতাখনৰ সকলো খেল ‘ছ’নী টেন ৫’ ত সম্প্ৰচাৰ কৰা হৈছে৷ আনহাতে, ছনী এল আই ভি এপছতো দৰ্শকে মেচ উপভোগ কৰিব পাৰিব৷