গ'গ' স্পৰ্টছ এন ইৰ প্ৰতিবেদন

অসমৰ প্ৰাক্তন প্ৰথম শ্ৰেণীৰ ক্ৰিকেটাৰ মুকুট দাসৰ মৃত্যুত অসম ক্ৰিকেট সন্থাই গভীৰ শোক প্ৰকাশ কৰিছে । বুধবাৰে গুৱাহাটীত ৭৪ বছৰ বয়সত তেওঁ শেষ নিশ্বাস ত্যাগ কৰে ।এজন প্ৰতিভাৱান অল-ৰাউণ্ডাৰ দাসে প্ৰথম শ্ৰেণীৰ ১৪খন খেলত অসমক প্ৰতিনিধিত্ব কৰি মুকুট দাসে খেলুৱৈ আৰু প্ৰশিক্ষক দুয়োটা ৰূপতে অসম ক্ৰিকেটলৈ উল্লেখযোগ্য অৱদান আগবঢ়াইছিল ।১৯৯৩–৯৪ আৰু ১৯৯৪–৯৫ চনত সৰ্বভাৰতীয় ভি এম ট্ৰফীৰ খিতাপ দখল কৰা অসম দলৰ লগতে ১৯৯৪–৯৫ চনত ৰেষ্ট অৱ ইণ্ডিয়াৰ বিৰুদ্ধে "মাধৱৰাও সিন্ধিয়া ট্ৰফী"ত বিজয়ী অসম দলটোৰো তেওঁ প্ৰশিক্ষক আছিল । খেলুৱৈ হিচাপে কেৰিয়াৰৰ পাছতো তেওঁ সুখ্যাতিৰে অসম ক্ৰিকেটলৈ সেৱা আগবঢ়াই গৈছিল। তেওঁ "বিজয় মাৰ্চেণ্ট ট্ৰফী"ৰ অসম দলৰ প্ৰশিক্ষকৰ লগতে জুনিয়ৰ বাছনি সমিতিৰ অধ্যক্ষ আৰু ছিনিয়ৰ বাছনি সমিতিৰ সদস্য হিচাপেও কাৰ্যনিৰ্বাহ কৰিছিল। তদুপৰি তেওঁ অসমৰ প্ৰবীণ ক্ৰিকেট সন্থাৰ যুটীয়া সম্পাদক হিচাপে কাৰ্যনিৰ্বাহ কৰিছিল ।

ক্ৰীড়াৰ সৈতে দীৰ্ঘদিনীয়া আৰু নিষ্ঠাবান সম্পৰ্কৰ জৰিয়তে দাসে অসম ক্ৰিকেটৰ বিকাশত স্মৰণীয় অৱদান আগবঢ়াইছিল। তেওঁৰ দায়বদ্ধতা, সেৱা আৰু খেলৰ জ্ঞানক ক্ৰিকেট সমাজে সদায়েই মনত ৰাখিব।অসম ক্ৰিকেট সন্থাই প্ৰয়াত মুকুট দাসৰ শোকসন্তপ্ত পৰিয়াল, বন্ধু-বান্ধৱী আৰু শুভাকাংক্ষী সকললৈ গভীৰ সমবেদনা জ্ঞাপন কৰিছে। তেওঁৰ মৃত্যু অসম ক্ৰিকেটৰবাবে অপূৰণীয় ক্ষতি ।

অসম ক্ৰিকেট সন্থাৰ সম্পাদক সনাতন দাসে জাৰি কৰা এক বিজ্ঞপ্তিত এই কথা প্ৰকাশ ।