গ'গ স্পৰ্টছ এন ইৰ প্ৰতিবেদন

ফ্ৰান্সৰ এলেক্স লানিয়াৰ আৰু কোৰিয়াৰ আন ছি ইয়ঙে নতুন দিল্লীত অনুষ্ঠিত বি ডব্লিউ এফ বিশ্ব বেডমিণ্টন চেম্পিয়নশ্বিপৰ পুৰুষ আৰু মহিলাৰ সোণৰ পদক লাভ কৰিছে৷ ইন্দিৰা গান্ধী ইনড’ৰ ষ্টেডিয়ামত দেওবাৰে সামৰণি পৰা প্ৰতিযোগিতাখনৰ পুৰুষৰ একক শাখাৰ ফাইনেলত নৱম বাচনিৰ এলেক্সে ২১-১১, ২১-১১ ৰ পোনপটিয়া ব্যৱধানত পৰাস্ত কৰে জাপানৰ দশম বাচনিৰ শ্বাটলাৰ ক’ডাই নাৰাঅ’কাক৷ ৫০ মিনিটৰ মেচখনত জয়ৰে এলেক্সে বি ডব্লিউ এফ চেম্পিয়নশ্বিপত প্ৰথম ফৰাচী বিশ্ব চেম্পিয়ন হোৱাৰ গৌৰৱ লাভ কৰিছে৷

ইফালে, মহিলাৰ একক শাখাৰ খিতাপৰ যুঁজত মুখামুখি হৈছিল শীৰ্ষ দুটা স্থানৰ শ্বাটলাৰ কোৰিয়াৰ আন ছি ইয়ং আৰু জাপানৰ আকানা য়ামাগুচি৷ ৪৮ মিনিটৰ মেচখনত ইয়ঙে ২১-১৭, ২১-১৪ ৰ পোনপটিয়া ব্যৱধানত জয়লাভ কৰে৷

মিক্সড ডাবলছৰ খিতাপ লাভ কৰে ফ্ৰান্সৰ টম গিকুৱেল আৰু ডেলফিন ডেলৰুৱে৷ পঞ্চম বাচনিৰ যুটিটোৱে শীৰ্ষ বাচনিৰ চীনৰ ফেং ইয়ান আৰু হুৱাং ডং পিঙক পৰাস্ত কৰে৷ তিনিটা ছেটৰ ৭৮ মিনিট ধৰি চলা মেচখনত ফৰাচী শ্বাটলাৰদ্বয়ে ২২-২০, ১৯-২১, ২১-১৫ ৰ ব্যৱধানত জয়লাভ কৰে৷ উল্লেখ্য যে টম-ডেলফিনে ফ্ৰান্সৰ প্ৰথম শ্বাটলাৰ হিচাপে বিশ্ব বেডমিণ্টনত খিতাপ অৰ্জন কৰি ইতিহাস গঢ়িবলৈ সক্ষম হয়৷

ইফালে, মহিলা ডাবলছতো চীনৰ খেলুৱৈয়ে মুখথেকেছা খাব লগা হয়৷ ভাৰতৰ তৃষা-গায়ত্ৰীক ছেমিফাইনেলত পৰাস্ত কৰা শীৰ্ষ বাচনিৰ চীনৰ যুটি লিউ শ্বেং ছু আৰু টান নিঙে ফাইনেলত পৰাস্ত হৈ ৰূপৰ পদক লাভ কৰে৷ তৃতীয় বাচনিৰ কোৰিয়াৰ বয়েক হা না আৰু লী ছ’ হীয়ে ২১-১৫, ২১-১৫ ৰ পোনপটিয়া ব্যৱধানত চীনৰ প্ৰতিদ্বন্দ্বীক হৰুৱাই সোণ অৰ্জন কৰে৷

উল্লেখ্য যে নতুন দিল্লী বি ডব্লিউ এফ বিশ্ব বেডমিণ্টন ফ্ৰান্সৰ বাবে ঐতিহাসিক সাফল্যৰ ঘটনা হিচাপে চিৰস্মৰণীয় হৈ ৰব৷ এই প্ৰতিযোগিতাৰ পূৰ্বে দেশখনৰ কোনো শ্বাটলাৰে বিশ্ব বেডমিণ্টনত খিতাপ জয় কৰাটো দুৰৰে কথা ফাইনেলো খেলা নাছিল৷ কিন্তু আজি পুৰুষৰ এককত এলেক্স আৰু মিক্সড ডাবলছত টম-ডেলফিনে সোণ লাভ কৰি ইতিহাস গঢ়িলে৷ ইয়াৰপূৰ্বে এই তিনি ফৰাচী শ্বাটলাৰে কালি ফাইনেলত প্ৰৱেশ কৰিয়েই দেশবাসীক প্ৰথম গৌৰৱ দিছিল৷

ইফালে, প্ৰতিযোগিতাত চীনৰ শ্বাটলাৰৰ ব্যৰ্থতা দেশখনৰ বাবে নেতিবাচক দিশ৷ এককৰ এখনো ফাইনেলত চীনৰ খেলুৱৈ নথকাৰ বিপৰীতে ডাবলচৰ তিনিখনতে দেশখনৰ শ্বাটলাৰ আছিল যদিও মহিলা ডাবলচ আৰু মিক্সড ডাবলচত শীৰ্ষ বাচনিৰ চীনা যুটি পৰাস্ত হয়৷ চীনৰ সন্মান ৰক্ষা কৰে পুৰুষৰ ডাবলচত খিতাপ জয় কৰা ৱাং চেং আৰু লিয়াং ৱেই কৱঙে৷ তৃতীয় বাচনিৰ যুটিটোৱে ২১-১৭, ২১-১৬ ৰ পোনপটিয়া ব্যৱধানত চতুৰ্থ বাচনিৰ মালয়েছিয়াৰ যুটি আৰ’ন চিয়া আৰু ছ’হ ৱ’ই য়িক পৰাস্ত কৰে৷