গ'গ স্পৰ্টছ এন ইৰ প্ৰতিবেদন

চলিত ইম্পেৰিয়েল ব্লু পেকেজড ড্ৰিংকিং ৱাটাৰ অসম প্ৰিমিয়াৰ লীগৰ আজি হোৱা এখন হাইস্ক’ৰিং মেচত গুৱাহাটী ৰয়েলছে তিনি উইকেটত চৰাইদেউ ছানৰাইজাৰ্ছক পৰাস্ত কৰি অভিলেখ গঢ়ে৷ গুৱাহাটীৰ এ চি এ ষ্টেডিয়ামত এ পি এলৰ কুৰিখন মেচ হৈ যোৱাৰ পাছত মংগলবাৰে ২১ নম্বৰ খেলখনত উভয় দলে নিজৰ ইনিংছত দুশৰো অধিক ৰাণ কৰি চমক সৃষ্টি কৰিবলৈ সক্ষম হয়৷ মেচখনত দূয়ো দলৰ বেটাৰে অভিলেখৰ ওপৰত অভিলেখ গঢ়ে৷

উল্লেখ্য যে চৰাইদেউ দলে দিয়া ২০৯ ৰাণৰ বিজয়লক্ষ্য অনুসৰণ কৰি গুৱাহাটী ৰয়েলছে তিনিটা বল বাকী থাকোতেই ৭ উইকেটত ২১২ ৰাণেৰে স্মৰণীয় মেচখনত জয়লাভ কৰে৷ যোৱা ২৪ ঘণ্টাৰ ভিতৰত এয়া গুৱাহাটীৰ দ্বিতীয় জয় তথা ছখন মেচত ১০ পইণ্টৰে দলে শীৰ্ষস্থান অক্ষুন্ন ৰাখিছে৷ অভিলেখৰ বিজয়লক্ষ্য অনুসৰণ কৰা ৰয়েলছক বিস্ফোৰক আৰম্ভনি দিয়ে উইকেটৰক্ষক বেটাৰ ৰোহিত সেনে৷ প্ৰথমটো অভাৰতে ২৪ ৰাণ কৰা ৰোহিতে ১৫ বলত লীগৰ দ্ৰুত অৰ্ধশতক অৰ্জন কৰাৰ লগতে পাৱাৰ প্লেত দুই উইকেটত ১০১ ৰাণ কৰি আন এক অভিলেখ গঢ়ে৷ ইয়াৰে ৭৩ ৰাণে আছিল ৰোহিতৰ৷ সতীৰ্থৰ সহযোগ নাপালেও ৰোহিতে ধুমুহাৰ গতিত বেটিং কৰি ৩৮ বলত ৯৬ ৰাণৰ দৃষ্টিনন্দন ইনিংছ খেলি চাৰি ৰাণৰ বাবে শতকৰ পৰা বঞ্চিত হয়৷ অপেনাৰজনৰ ইনিংছত আছিল ১০ টা ছিক্সাৰ৷

অৱশ্যে ২৪২ ৰাণেৰে কমলা টুপী লাভ কৰে ৰোহিতে৷ ১১.৩ অভাৰত দলীয় স্ক’ৰ ১৪৮-৪ ত ৰোহিত আউট হয় যদিও ইতিমধ্যে তেওঁ মেচ ছানৰাইজাৰ্ছৰ হাতৰ পৰা উলিয়াই আনিছিল৷ গুঞ্জনজ্যোতি ডেকাই ৩৮ ত তথা মৃন্ময়ে ১৬ ৰাণত অপৰাজিত থাকি গুৱাহাটীক চমকপ্ৰদ জয় দিয়ে৷

ইয়াৰপূৰ্বে পোনতে বেটিং কৰা চৰাইদেউ ছানৰাইজাৰ্ছে নিৰ্ধাৰিত অভাৰত দুই উইকেট হেৰুৱাই ২০৮ ৰাণ কৰি প্ৰথম দল হিচাপে লীগত দুশ ৰাণ কৰাৰ অভিলেখ গঢ়িছিল৷ আনহাতে দলৰ অধিনায়ক সুমিত ঘাদিগাওকাৰে প্ৰথম বেটাৰৰূপে লীগত শতক অৰ্জনৰ গৌৰৱ লাভ কৰে৷ ৬০ বলত শতক অৰ্জন কৰা সুমিতে ইনিংছৰ অন্তিমটো বলত ১০৭ ৰাণ [৬৪ বল] কৰি আউট হয়৷ এয়া এ পি এলত সৰ্বাধিক ব্যক্তিগত ৰাণ৷ উইকেটৰক্ষক অপেনাৰজনৰ ইনিংছত আছিল সাতটা ছিক্সাৰ৷

উল্লেখ্য যে ছানৰাইজাৰ্ছৰ দুই অপেনাৰ সুমিত আৰু প্ৰদ্যুন শইকীয়াই ১৪৩ ৰাণ [৮৭ বল] ৰ শ্ৰেষ্ঠ অপেনিং যুটিৰ অভিলেখ ভংগৰ লগতে যিকোনো উইকেটত সৰ্বাধিক ৰাণ সংগ্ৰহৰ গৌৰৱৰো অধিকাৰী হয়৷ প্ৰদ্যুনই ২৯ বলত আঠটা বাউণ্ডেৰীসহ ৫৯ ৰাণ কৰে৷ প্ৰদ্যুনৰ বিদায়ৰ পাছত সুমিতক সংগ দিয়া অম্লানজ্যোতি দাসে ১৯ বলত অপৰাজিত ৩০ ৰাণ কৰি অধিনায়কৰ লগত ৬৫ ৰাণৰ যুটি বান্ধে৷

অসম ক্ৰিকেট সন্থাৰ তত্বাৱধানত ‘আমাৰ অসম, আমাৰ গৌৰব’ মূলমন্ত্ৰৰে আয়োজন কৰা উদ্বোধনী বৰ্ষৰ এ পি এলৰ বুধবাৰে দিনৰ দুই হ’বলগা প্ৰথমখন খেলত ডিব্ৰুগড় ৱাৰিয়ৰ্ছ আৰু নগাঁও ৰেঞ্জাৰ্ছ মুখামুখি হ’ব৷ ইফালে, নিশা ৭ বজাত হ’বলগা দ্বিতীয়খন খেলত তেজপুৰ টাইটানছে বৰাক লিজেণ্ডছৰ বিৰুদ্ধে খেলিব৷

সংক্ষিপ্ত স্ক’ৰঃ
গুৱাহাটী ৰয়েলছে তিনি উইকেটত পৰাস্ত কৰে চৰাইদেউ ছানৰাইজাৰ্ছক

চৰাইদেউ ছানৰাইজাৰ্ছঃ ২০ অভাৰত ২০৮-২ [সুমিত ঘাদিগাওকাৰ ১০৭, প্ৰদ্যুন শইকীয়া ৫৯, অম্লান অপঃ৩০ ; বাস্তৱ ৩২-১ , দীপক ৪৪-১৷

গুৱাহাটী ৰয়েলছঃ ১৯.৩ অভাৰত ২১২-৭ [ৰোহিত সেন ৯৬, গুঞ্জনজ্যোতি অপঃ৩৮, নীবিৰ ২১ ; দিবাকৰ ৩৪-৩ কালাম ৰাইজা ৩৯-২৷