গ'গ' স্পৰ্টছ এন ইৰ প্ৰতিবেদন

অসম টেনিছ সন্থাৰ উদ্যোগত গুৱাহাটীৰ চচলস্থিত কমপ্লেক্সত অনুষ্ঠিত "আই টি এফ ৱ’ল্ড মাষ্টাৰ্ছ এম টি ২০০ আন্তৰ্জাতিক ৰেংকিং টেনিছ প্ৰতিযোগিতা"ৰ সফল সামৰণি পৰিছে৷ ছিনিয়ৰ পুৰুষ আৰু মহিলাৰ প্ৰতিযোগিতাখনত আয়োজক ভাৰতৰ চাৰি খেলুৱৈয়ে নিজৰ বয়স শাখাত একক তথা ডাবলচৰ খিতাপ অৰ্জন কৰি দ্বিমুকুট লাভ কৰিবলৈ সক্ষম হৈছে৷ গৌৰৱ অৰ্জন কৰা চাৰি খেলুৱৈ হ’লঃ প্ৰেমজিৎ সিং, ছৰণদ্বীপ সিং, বালকৃষ্ণন ভাটিয়া আৰু শ্বেইলী ত্ৰিবেদী৷

প্ৰতিযোগিতাৰ সকলো শাখাৰে ফাইনেল শুক্ৰবাৰে অনুষ্ঠিত হয়৷ পুৰুষৰ ৩৫ বছৰ উধ্বৰ্ৰ একক শাখাত প্ৰেমজিতে সতীৰ্থ ইন্দ্ৰকুমাৰ সিঙক ৬-১, ৬-২ ৰ ব্যৱধানত পৰাস্ত কৰি খিতাপ জয়ৰ কৰে৷ আনহাতে, এই শাখাৰ ডাবলচৰ ফাইনেলত ইন্দ্ৰজিত-প্ৰেমজিত যুটিয়ে ৬-১, ৬-৪ ৰ পোনপটিয়া ব্যৱধানত পৰাস্ত কৰে প্ৰীতম দাস শৰ্মা আৰু পেমা নবুৰ্ক৷

ইফালে, পুৰুষৰ ৪৫ বছৰ উধ্বৰ্ৰ ফাইনেলত ছৰণদ্বীপে ৬-৩, ৬-২ ৰ ব্যৱধানত ৰোহিত লালাক পৰাস্ত কৰাৰ লগতে ডাবলচত ছৰণদ্বীপে শ্বাহনৱাজ জাফৰৰ লগত যুটি বান্ধি ৬-৩, ৬-৩ ৰ ব্যৱধানত ৰোছন কান্ত ঘিছিং আৰু ৰাজকুমাৰ সিঙক পৰাস্ত কৰে৷ ৫৫ বছৰ উধ্বৰ্ৰ এককৰ ফাইনেলত বালকৃষ্ণনে ৬-০, ৪-৬, ১১-৯ ৰ ব্যৱধানত ৰোছন কান্তক পৰাস্ত কৰাৰ পাছত ডাবলচত সংগী অৰুন আগৰৱালাৰ স’তে যুটি বান্ধি ৬-২, ৬-১ ৰ ব্যৱধানত ৰণদ্বীপ বৰুৱা আৰু হাকিম আলীক পৰাস্ত কৰে৷

ইফালে, মহিলাৰ ৩৫ বছৰ উধ্বৰ্ৰ একক শাখাত শ্বেইলী ত্ৰিবেদী চেম্পিয়ন আৰু ৰাণী কৌড় ৰানাৰ্ছ আপ হয়৷ এই শাখাৰে ডাবলচৰ খিতাপ জয় কৰে শ্বেইলী আৰু ববিতা মহন লাংথাছাই৷ বিপৰীতে ৰানাৰ্ছ আপ হয় নাজনীন ৰহমান আৰু ৰাণী৷ নাজনীন ৪৫ উধ্বৰ্ৰ এককত চেম্পিয়ন হোৱাৰ বিপৰীতে ববিতা ৰানাৰ্ছ আপ হয়৷

ইফালে, পুৰুষৰ এককৰ ৬৫ বছৰ উধ্বৰ্ৰ ফাইনেলত দিলীপ সিঙে ৬-০, ৬-১ ৰ ব্যৱধানত লেইচেমছানা মীতেই চিংগনবামক পৰাস্ত কৰাৰ বিপৰীতে এই শাখাৰ ডাবলচত ভাৰত ফুকন আৰু শিবু মেথিউ চেম্পিয়ন তথা দিলীপ আৰু লেইচেমছানা ৰানাৰ্ছআপ হয়৷

প্ৰতিযোগিতাৰ সামৰণি অনুষ্ঠানত ট্ৰফী প্ৰদান কৰে অসম টেনিছ সন্থাৰ সম্পাদক অংকুশ দত্ত আৰু জ্যেষ্ঠ টেনিছ খেলুৱৈ টিকেন চন্দ্ৰ বসুমতাৰীয়ে৷ অনুষ্ঠানটো পৰিচালনা কৰে আন্তঃৰাষ্ট্ৰীয় টেনিছ ফেডাৰেচনৰ তত্বাৱধায়ক গীতিকা পলে৷