গ'গ' স্পৰ্টছ এন ইৰ প্ৰতিবেদন

চলিত "১৩৫ সংখ্যক ইণ্ডিয়ান অইল ডুৰাণ্ড কাপ ফুটবল প্ৰতিযোগিতা"ৰ গ্ৰুপৰ লীগ মেচৰ সমাপ্তিৰ পাছত এতিয়া অহা ১৬ আৰু ১৭ আগষ্টত অনুষ্ঠিত হ’ব চাৰিখন কোৱাৰ্টাৰ ফাইনেল ৷ আয়োজকে প্ৰকাশ কৰা সূচী অনুসৰি ১৬ আগষ্টত দিনৰ ৪ বজাত ৰাঁচিৰ বিৰ্ছামুণ্ডা ফুটবল ষ্টেডিয়ামত হ’বলগা মেচত এছ চি দিল্লীয়ে মনিপুৰৰ ক্লাব এফ চি ৰেংডাইৰ বিৰুদ্ধে খেলিব৷

একে দিনাই নিশা ৭ বজাত কলকাতাৰ বিবেকানন্দ যুৱভাৰতী ক্ৰীড়াংগনত হ’বলগা দ্বিতীয়খন কোৱাৰ্টাৰ ফাইনেলত আই এছ এলৰ চেম্পিয়ন ইষ্ট বেংগল এফ চিয়ে ভাৰতীয় সেনাৰ ফুটবল দলৰ বিৰুদ্ধে খেলিব৷ বিবেকানন্দ যুৱভাৰতী ক্ৰীড়াংগনতে ১৭ আগষ্টত দিনৰ ৪ বজাত হ’বলগা মেচত সৰ্বাধিক ১৭ বাৰ ডুৰাণ্ড কাপৰ খিতাপ দখল কৰা মোহন বাগান মুখামুখি হ’ব জামছেদপুৰ এফ চিৰ৷

ইফালে, যোৱা দুটা ছিজনৰ চেম্পিয়ন নৰ্থ ইষ্ট ইউনাইটেড এফ চিয়ে ১৭ আগষ্টত নিশা ৭ বজাত শ্বিলঙৰ জৱাহৰলাল নেহৰু ষ্টেডিয়ামত হ’বলগা চতুৰ্থখন কোৱাৰ্টাৰ ফাইনেলত স্থানীয় দল শ্বিলং লাজং এফ চিৰ বিৰুদ্ধে খেলিব৷

উল্লেখ্য যে, ইষ্ট বেংগল এফ চি আৰু জামছেদপুৰ এফ চিৰ বাদে অন্য ছটা দলে নিজৰ নিজৰ গ্ৰুপত শীৰ্ষস্থান লাভ কৰি কোৱাৰ্টাৰ ফাইনেলত প্ৰৱেশ কৰিছে৷

ভাৰতীয় ফুটবল ইতিহাসৰ গৌৰৱময় সাক্ষী লগতে এছিয়াৰ আটাইতকৈ প্ৰাচীন তথা বিশ্বৰ পঞ্চম পুৰণি ফুটবল প্ৰতিযোগিতাখনৰ সকলো খেল ‘ছ’নী টেন ৫’ ত সম্প্ৰচাৰ কৰা হৈছে৷ আনহাতে, ছনী এল আই ভি এপছতো দৰ্শকে মেচ উপভোগ কৰিব পাৰিব৷