গ'গ স্পৰ্টছ এন ইৰ প্ৰতিবেদন

অসমৰ অৰুশ দাস আৰু মৃগাক্ষী চাংমাইয়ে চমক সৃষ্টি কৰি গুৱাহাটীৰ চচল টেনিছ প্ৰকল্পত চলি থকা অইল আইটা ছুপাৰ ছিৰিজ টেনিছ প্ৰতিযোগিতাৰ ১৬ বছৰ অনুৰ্ধৰ ল’ৰা-ছোৱালীৰ একক শাখাৰ ছেমিফাইনেলত প্ৰৱেশ কৰিছে৷ বুধবাৰে হোৱা কোৱাৰ্টাৰ ফাইনেলত অষ্টম বাচনিৰ আৰুশে শীৰ্ষ বাচনিৰ বংগৰ হাবিশ বানচালক ৬-০, ৬-৭, ৬-১ ৰ ব্যৱধানত পৰাস্ত কৰে৷ একেদৰে ছোৱালীৰ শীৰ্ষ বাচনিৰ বংগৰ আনিয়া বিশ্বাসক অসম কন্যা মৃগাক্ষীয়ে ৬-০, ৬-১ ৰ পোনপটিয়া ব্যৱধানত হৰুৱাই আন এক চাঞ্চল্য সৃষ্টিৰে ছেমিফাইনেললৈ অগ্ৰসৰ হয়৷

অসম টেনিছ সন্থাৰ উদ্যোগত অনুষ্ঠিত প্ৰতিযোগিতাখনৰ বুধবাৰে ল’ৰা আৰু ছোৱালীৰ ১৪ আৰু ১৬ বছৰ অনুৰ্ধৰ দুয়োটা শাখাৰে এককৰ কোৱাৰ্টাৰ ফাইনেলৰ মেচসমুহ অনুষ্ঠিত হয়৷ অসমৰ নিব্ৰাছ হুছেইনে দূয়োটা শাখাৰে ছেমিফাইনেলত প্ৰৱেশ কৰিছে৷ নিব্ৰাছে ১৪ অনুৰ্ধৰ মেচত মিজোৰামৰ ছাইলোক পৰাস্ত কৰাৰ বিপৰীতে ১৬ বছৰ অনুৰ্ধৰ খেলত মহাৰাষ্ট্ৰৰ অনিৰুদ্ধক হৰুৱায়৷ ১৬ অনুৰ্ধৰ আন এখন কোৱাৰ্টাৰ ফাইনেলত সপ্তম বাচনিৰ অসমৰ চান্দোগ্য টি পাঠকে মহাৰাষ্ট্ৰৰ তৃতীয় বাচনিৰ প্ৰনবক পৰাস্ত কৰে৷

একেদৰে ১৬ বছৰ অনুৰ্ধৰ ছোৱালীৰ কোৱাৰ্টাৰত অসমৰ কৃষ্টি হালৈয়ে তৃতীয় বাচনিৰ মহাৰাষ্ট্ৰৰ জানিছাক পৰাস্ত কৰে যদিও ১৪ অনুৰ্ধত পৰাজয়ৰ সন্মুখিন হয়৷ ইফালে, ৰাজ্যৰ আন এগৰাকী প্ৰতিভাবান খেলুৱৈ ফাগুন জ্যোতিয়ে ১৬ অনুৰ্ধ কোৱাৰ্টাৰত পৰাস্ত হ’লেও মহাৰাষ্ট্ৰৰ জানিছাক পৰাস্ত কৰি ১৪ অনুৰ্ধৰ ছেমিফাইনেললৈ অগ্ৰসৰ হয়৷ আনহাতে, ল’ৰাৰ ১৪ অনুৰ্ধৰ ছেমিফাইনেলত দ্বিতীয়জন অসমৰ খেলুৱৈৰূপে ঈশানদ্বীপ বড়োই যোগ্যতা অৰ্জন কৰিছে৷

ইফালে, ১৬ অনুৰ্ধৰ ল’ৰাৰ ডাবলছ শাখাত অসমৰ যুটি জ্যোতিষ্মান কাশ্যপ আৰু ধৃতিস্মান ৰয় ছেমিফাইনেলত প্ৰৱেশ কৰাৰ লগতে নিব্ৰাছে মহাৰাষ্ট্ৰৰ প্ৰনৱৰ লগত যুটি বান্ধি অন্তিম চাৰিত প্ৰৱেশ কৰে৷

অসম টেনিছ সন্থাৰ সম্পাদক তথা প্ৰতিযোগিতাৰ সঞ্চালক অংকুশ দত্তই জনোৱা অনুসৰি সৰ্বভাৰতীয় টেনিছ সন্থা [আইটা] ৰ স্বীকৃত ৰাষ্ট্ৰীয় ৰেংকিং প্ৰতিযোগিতাখনৰ সকলো ছেমিফাইনেল তথা ডাবলছৰ ফাইনেল কাইলৈ অনুষ্ঠিত হ’ব৷ আনহাতে, অহা ১৪ আগষ্টত প্ৰতিযোগিতাখন সামৰণি পৰিব৷