গ'গ স্পৰ্টছ এন ইৰ প্ৰতিবেদন

চলিত ইম্পেৰিয়েল ব্লু পেকেজড ড্ৰিংকিং ৱাটাৰ অসম প্ৰিমিয়াৰ লীগৰ মংগলবাৰে নিশা অনুষ্ঠিত দিনটোৰ দ্বিতীয়খন মেচত যোৰহাট ষ্টেলিয়নছে তিনি উইকেটত পৰাস্ত কৰে তেজপুৰ টাইটানছক৷ অৱশ্যে উভয় দল ছেমিফাইনেলৰ দৌৰৰ পৰা ইতিপূৰ্বে আঁতৰি অহাত এই মেচ লীগৰ সমীকৰণৰে কাৰ্যতঃ গুৰুত্বহীন আছিল৷

গুৱাহাটীৰ এ চি এ ষ্টেডিয়ামত অনুষ্ঠিত মেচখনত পোনতে বেটিং কৰি তেজপুৰ টাইটানছে ২০ অভাৰত আঠ উইকেট হেৰুৱাই ১৫৬ ৰাণ কৰে৷ দলৰ হৈ ৱাছিম আক্ৰমে ৩৭, নিহাৰ ডেকাই ৩২ আৰু ডানিছ আহমেদে ২১ ৰাণ কৰি গুৰুত্বপূৰ্ণ অবদান আগবঢ়ায়৷ ষ্টেলিয়নছৰ হৈ ৰেজাকুদ্দিন আহমেদে ২৮, বেদান্ত পাণ্ডে ৩১ আৰু মণ্টু যাদবে ৩২ ৰাণ দি দুটাকৈ উইকেট পায়৷

প্ৰত্যুত্তৰত যোৰহাট ষ্টেলিয়নছে ১৮.৫ অভাৰত সাত উইকেট হেৰুৱাই ১৫৭ ৰাণ কৰি বিজয়লক্ষ্যত উপনিত হয়৷ দলৰ হৈ ৰাজবিৰ সিঙে [৫০] অৰ্ধশতক অৰ্জন কৰাৰ বিপৰীতে দ্যুতিময় নাথে ৩৫ আৰু স্বৰূপম পুৰকায়স্থই ২৯ ৰাণ কৰে৷ টাইটানছৰ হৈ আয়ুষ্মান মালাকাৰে ৩৬ ৰাণত তিনিটা আৰু সিদ্ধাৰ্থ শৰ্মাই ১৮ ৰাণ দি দুটা উইকেট দখল কৰে৷

অসম ক্ৰিকেট সন্থাৰ তত্বাৱধানত ‘আমাৰ অসম, আমাৰ গৌৰব’ মূলমন্ত্ৰৰে আয়োজন কৰা উদ্বোধনী বৰ্ষৰ এ পি এলৰ কাইলৈ দিনৰ ২ বজাত হ’বলগা প্ৰথমখন খেলত চৰাইদেউ ছানৰাইজাৰ্ছ আৰু গুৱাহাটী ৰয়েলছ মুখামুখি হ’ব৷ ছানৰাইজাৰ্ছৰ এয়া অন্তিম মেচ আৰু দলক নিশ্চিত জয় প্ৰয়োজন ছেমিফাইনেলত প্ৰৱেশৰ আশা সজীৱ ৰখাৰ বাবে৷ ইফালে, নিশা ৭ বজাত হ’বলগা দ্বিতীয়খন খেলত বৰপেটা ব্ৰেভছে যোৰহাট ষ্টেলিয়নছৰ বিৰুদ্ধে খেলিব৷

সংক্ষিপ্ত স্ক’ৰঃ
যোৰহাট ষ্টেলিয়নছে তিনি উইকেটত পৰাস্ত কৰে তেজপুৰ টাইটানছক

তেজপুৰ টাইটানছঃ ২০ অভাৰত ১৫৬-৮ [ৱাছিম আক্ৰম ৩৭, নিহাৰ ডেকা ৩২, ডানিছ আহমেদ ২১ ; ৰেজাকুদ্দিন আহমেদ ২৮-২, বেদান্ত পাণ্ডে ৩১-২, মণ্টু যাদব ৩২-২]৷

যোৰহাট ষ্টেলিয়নছঃ ১৮.৫ অভাৰত ১৫৭-৭ [ৰাজবিৰ সিং ৫০, দ্যুতিময় নাথ ৩৫, স্বৰূপম পুৰকায়স্থ ২৯ ; আয়ুষ্মান মালাকাৰ ৩৬-৩ সিদ্ধাৰ্থ শৰ্মা ১৮-২]৷