গ'গ স্পৰ্টছ এন ইৰ প্ৰতিবেদন

পি ভি সিন্ধুৰ পাছত দ্বিতীয় ভাৰতীয় শ্বাটলাৰৰূপে মহিলাৰ একক শাখাত অংশ লোৱা উন্নতি হুদাই চলিত বি ডব্লিউ এফ বিশ্ব বেডমিণ্টন চেম্পিয়নশ্বিপত জয়ৰে অভিযান আৰম্ভ কৰিছে৷ ভাৰতীয় বেডমিণ্টন সন্থাৰ উদ্যোগত নতুন দিল্লীৰ ইন্দিৰা গান্ধী ইনড’ৰ ষ্টেডিয়ামত অনুষ্ঠিত প্ৰতিযোগিতাৰ মংগলবাৰে দ্বিতীয় দিনটোত উন্নতিয়ে ম্যানমাৰৰ থুজাৰ দেট হটাৰক ২২-২০, ২১-১৬ ৰ পোনপটিয়া ব্যৱধানত পৰাস্ত কৰি দ্বিতীয় ৰাউণ্ডলৈ অগ্ৰসৰ হয়৷

বি ডব্লিউ এফ বিশ্ব বেডমিণ্টনৰ অভিষেক মেচখনত জয়ৰ বাবে উন্নতিক প্ৰয়োজন হয় মাত্ৰ ৪০ মিনিট৷ দ্বিতীয় ৰাউণ্ডত কাইলৈ কানাডাৰ মিচেল লীৰ মুখামুখি হ’ব উন্নতি৷ ইফালে, বুধবাৰে সিন্ধুও কানাডাৰে ৱেন য়ু ঝাঙৰ বিৰুদ্ধে খেলিব৷ ইফালে, ডিফেণ্ডিং চেম্পিয়ন তথা শীৰ্ষ বাচনিৰ চীনৰ শ্বি য়ুকিক প্ৰথম ৰাউণ্ডতে বিদায় দি ঐতিহাসিক অঘটন সৃষ্ঠি কৰা ভাৰতৰ উদীয়মান তাৰকা আয়ুষ ছেট্টী বুধবাৰে পুৰুষৰ একক শাখাৰ ৰাউণ্ড অব ৩২ ৰ মেচত শ্ৰীলংকাৰ ডুমিণ্ডু এবেবিক্ৰমাৰ মুখামুখি হ’ব৷

ইয়াৰপূৰ্বে মংগলবাৰে দ্বিতীয় দিনা ভাৰতীয় শ্বাটলাৰ প্ৰতিযোগিতাত প্ৰথম ব্যৰ্থতাৰ সন্মুখীন হয়৷ মিক্সড ডাবলচ মেচত খেলা ৰোহন কাপুৰ আৰু ৰুথভিকা শিৱানী কানাডাৰ জনাথন লাই আৰু ক্ৰিষ্টাল লাইৰ বিৰুদ্ধে প্ৰথম ৰাউণ্ডৰ মেচত পৰাস্ত হয়৷ এঘণ্টা আঠ মিনিট ধৰি চলা তিনিটা ছেটৰ মেচখনত ৰোহন-শিৱানীয়ে প্ৰথমটো ছেট ২২-২০ ত দখল কৰিছিল যদিও পৰবৰ্তী ছেট দুটা ১৯-২১, ১৭-২১ ৰ ব্যৱধানত হেৰুৱায় প্ৰতিযোগিতাৰ পৰা বিদায় লয়৷

মিক্সড ডাবলচতে ভাৰতৰ আন এটা যুটি আশীথ সূৰ্য আৰু অমৰুথা প্ৰমথেছেও দুৰ্ভাগ্যক্ৰমে প্ৰথম ৰাউণ্ডতে অভিযান সামৰে৷ প্ৰচণ্ড যুঁজৰ অন্তত তুৰস্কৰ যুটি আমৰে ছ’নমেজ আৰু য়াছেমিন বেকটাছে এঘণ্টা এঘাৰ মিনিটৰ খেলত ১৬-২১, ৩০-২৯, ২৪-২২ ৰ ব্যৱধানত ঘৰুৱা যুটিটোক পৰাস্ত কৰে৷

ভাৰতৰ মহিলা ডাবলছ যুটি গায়ত্ৰী গোপীচান্দ আৰু তৃষা জলীয়ে দ্বিতীয় ৰাউণ্ডৰ মেচত আমেৰিকাৰ ষষ্ঠদশ বাচনিৰ লৌৰেন ৰাম আৰু আলিছন লীক ২১-১৫, ২১-১২ ৰ পোনপটিয়া ব্যৱধানত পৰাস্ত কৰি প্ৰি-কোৱাৰ্টাৰ ফাইনেলত প্ৰৱেশ কৰিছে৷

কিন্তু বি ডব্লিউ এফ বিশ্ব বেডমিণ্টন চেম্পিয়নশ্বিপত অভিষেক কৰা ভাৰতৰ ছিমৰন সিংঘী আৰু কবিপ্ৰিয়া চেলভামে মংগলবাৰে মহিলাৰ ডাবলছৰ দ্বিতীয় ৰাউণ্ডৰ মেচত বুলগেৰিয়াৰ ষ্টেফানি ষ্ট’ৱেভা আৰু গ্ৰেব্ৰিয়েলা ষ্ট’ৱেভাৰ বিৰুদ্ধে ৭-২১, ১৪-২১ ত পৰাস্ত হৈ বিদায় লয়৷

ভাৰতৰ লক্ষ্য সেনে পুৰুষৰ একক শাখাৰ প্ৰথম ৰাউণ্ডৰ খেলত অষ্ট্ৰিয়াৰ ক’লিনছ ভালেণ্টিনো ফিলিমনক ১৬-২১, ২১-৮, ২১-৪ ৰ ব্যৱধানত পৰাস্ত কৰিছে৷ ৰাউণ্ড অব ৬৪ ৰ মেচখন তিনিটা ছেটত ফলাফল নিৰ্ণয় হয় তথা ৪৪ মিনিট ধৰি চলে৷ প্ৰতিযোগিতাত সেনে ৰেংকিঙত ১৪ নম্বৰ স্থান লাভ কৰিছে৷